የቴክኖሎጂ ባርነት" ወይም 'ዲጂታል ፊውዳሊዝም'

የቴክኖሎጂ ባርነት" ወይም "ዲጂታል ፊውዳሊዝም" ዘመናዊውን የዲጂታል ዓለም በመካከለኛው ዘመን ከነበረው የመሬት ከበርቴዎች (ፊውዳሎች) እና የጭሰኞች ግንኙነት ጋር በማነጻጸር የሚገልጽ ፅንሰ-ሀሳብ ነው።

በመካከለኛው ዘመን ፊውዳሎች መሬቱን በብቸኝነት ይቆጣጠሩ ነበር፤ ጭሰኞች ደግሞ መሬት ስላልነበራቸው በፊውዳሎች መሬት ላይ ላባቸውን አንጠፍጥፈው የሚገኘውን ምርት ለጌቶቻቸው ያስረክቡ ነበር።

በዘመናዊው የዲጂታል ዘመን ደግሞ መሬቱ በ"ክላውድ እና በAI መሠረተ-ልማቶች" ተተክቷል። ጥቂት የማይባሉ ግዙፍ የአሜሪካ እና የቻይና የቴክኖሎጂ ኩባንያዎች (Google፣ Microsoft፣ OpenAI፣ Amazon፣ Apple ወዘተ) የዲጂታል ዓለም ፊውዳሎች ሆነዋል።

ይህም የሆነው የAI ሞዴሎችን ለማልማት እና መረጃዎችን ለማቀናበር እጅግ ግዙፍ ሱፐር ኮምፒውተሮች፣ ከፍተኛ መዋእለ ንዋይ እና የተራቀቁ መሠረተ ልማት የሚጠይቅ በመሆኑ ነው:: በዚህ ምክንያት እነዚህን መሠረተ-ልማቶች መገንባት የሚችሉት ደግሞ ጥቂት በሀብት የናጠጡ ኩባንያዎች (ዲጂታል ከበርቴዎች) ብቻ ሆነዋል።

ስለሆነም ግለሰብ ተጠቃሚዎች፣ ተቋማት/ስታርትአፖች እና በርካታ አገራት "ዲጂታል መሬት" ስለሌለን ልክ እንደ ጭሰኛ ገበሬዎቹ የእነሱን መተግበሪያዎች እና APIs ለመጠቀም ተገድደናል። በነጻ ወይም በክፍያ የእነሱን APIs እና መሠረተ-ልማት ለመጠቀም የምናስገባው መረጃ በሙሉ በእጃቸው ያስገባሉ። መረጃዎን ተጠቅመውም የራሳቸውን የAI አእምሮ የበለጠ ያበለጽጋሉ። በሀብትም ይበልጥ ይበለጽጋሉ።

በአጠቃላይ ጥቂት ግዙፍ የቴክኖሎጂ ኩባንያዎች የክላውድ እና የ-AI መሠረተ-ልማቶችን በብቸኝነት በመቆጣጠር የተጠቃሚዎችን (የግለሰቦችም ሆነ የሀገራትን) መረጃ/Data ያለገደብ የሚበዘብዙበት አደገኛ የዲጂታል ፊውዳሊዝም ሥርዓት ፈጥረዋል።

ይህንን ሥርዓት ይበልጥ አሳሳቢ እና አደገኛ የሚያደርጉት የቴክኖሎጂ ፊውዳል ስርዓት የዓለምን የሃብት እና የሥልጣን ሚዛን በጥቂት የቴክኖሎጂ ቢሊየነሮች እጅ የሚያከማች በመሆኑ ነው። በዚህ ዘመን የእነዚህ ፊውዳሎች ቴክኖሎጂን አለመጠቀም የማይቻል በመሆኑ ሀገራት 'ሉዓላዊነታቸውን" ገላልጠው ከመስጠት የተሻለ አማራጭ አጥተዋል። የባንክ፣ የጤና እና የብሔራዊ ደህንነት መረጃዎቻቸውን ሳይቀር ለባዕድ ኩባንያዎች ሰርቨር ተጋልጠዋል።