መጪውን ዘመን የሚቀርጹ ቴክኖሎጂ ነክ መረጃዎችን እናጋራለን።

Alltechup የተነሳው ከአንድ ቀላል ምልከታ ነው፤ በኢትዮጵያ ያለው የሰው ሰራሽ አስተውሎት እና የቴክኖሎጂ ሥነ-ምህዳር በፈጠራ ሥራዎች የተሞላ ቢሆንም የዘርፉ መረጃዎች ጥልቀት እና ስፋት ባለው አግባብ በአገር ውስጥ ቋንቋዎች ተደራሽ አይሆኑም። በዚህ ምክንያት በጣም ሰፊ የአጠቃቀም እና የግንዛቤ ክፍተት አለ።

ክፍተቱን መሰረት በማድረግ በተለያዩ የማህበራዊ ሚዲያዎች ማጋራት የጀመርናቸው የሰው ሰራሽ አስተውሎት (AI) እና ቴክኖሎጂ ነክ ዜናዎች፣ ትንተናዎች እና እይታዎች በአጭር ጊዜ ውስጥ ሰፊ አመኔታ እና ተቀባይነት በማግኘታቸው ወደ ድረገጽነት አሳድጎ በተደራጀ እና ዘላቂነት ባለው መልኩ ማስቀጠል አስፈላጊ ሆኖ አግኝተነዋል።

ድረ-ገጻችን በአገር በቀል የቴክኖሎጂ ማህበረሰቦች እና በዓለም አቀፉ ሥነ ምህዳር መካከል ድልድይ ማገልገል በሚያስችል አግባብ የተዋቀረ ነው። በአቅም ውስንነት ምክንያት ለጊዜው በአማርኛ ቋንቋ ድረገጽን ከተለያዩ ማህበራዊ ሚዲያዎች ጋር በማቀናጀት የምንጀምረው ቢሆንም በሂደት በተለያዩ የአገር ውስጥ ቋንቋዎች እና በፖድካስት ጭምር ተደራሽ እናደርገዋለን።

መነሻችን እና ግባችን ተራ የመረጃ ማሰራጫ መሆን ብቻ አይደለም፤ የዘርፉ ማህበረሰብ መድረክም መሆን ነው። የሰው ሰራሽ አስተውሎት እና ቴክኖሎጂ ስለ ምርቶች እና አገልግሎቶች ብቻ ሳይሆን ስለ ሰዎች፣ ማህበረሰቦች እና ስለ ፈጠራ ሁለንተናዊ የለውጥ ኃይል እንደሆነ እናምናለን።